Chennai: విమానంలో వచ్చిన ప్రయాణికుడి వద్ద కొండచిలువలు, తాబేళ్లు, కోతి!

చెన్నై: ఓ విమాన ప్రయాణికుడు భారత్‌కు అక్రమంగా తరలిస్తున్న జంతువులను చెన్నై విమానాశ్రయ అధికారులు స్వాధీనం చేసుకున్నారు. బ్యాంకాక్‌ నుంచి వస్తున్న TG-337 నంబర్‌ విమానంలో జంతువులను అక్రమంగా రవాణా చేస్తున్నారన్న నిఘా వర్గాల సమాచారంతో కస్టమ్స్‌ అధికారులు ఓ ప్రయాణికుడిని అదుపులోని తీసుకున్నారు. అతడి బ్యాగుల్లో నుంచి ఒక డి బ్రజ్జా జాతికి చెందిన కోతి, 15 కింగ్‌ స్నేక్స్‌, ఐదు కొండచిలువ పిల్లలు, రెండు అల్డబ్రా తాబేళ్లను స్వాధీనం చేసుకున్నారు. అవ్వన్నీ బతికే ఉన్నట్లు పేర్కొన్నారు.

జంతువులను అక్రమంగా తరలిస్తున్న నిందితుడిని అదుపులోకి తీసుకున్నట్లు అధికారులు వెల్లడించారు. యానిమల్స్ క్వారంటైన్ అండ్‌ సర్టిఫికేషన్ సర్వీసెస్ (AQCS)తో సంప్రదించిన అనంతరం వాటన్నింటిని థాయ్‌ ఎయిర్‌వేస్‌ ద్వారా తిరిగి స్వదేశానికి పంపనున్నట్లు స్పష్టం చేశారు. ఆ జంతువుల పొటోలను కస్టమ్స్‌ అధికారులు ట్విటర్‌ వేదికగా పంచుకున్నారు.