India Corona: కరుగుతున్న కరోనా కేసుల కొండ!

వరుసగా మూడోరోజూ కొత్త కేసులు, మరణాలు తగ్గుముఖం

దిల్లీ: దేశంలో కరోనా కేసులు, మరణాలు వరుసగా మూడోరోజైన ఆదివారం కూడా తగ్గుముఖం పట్టాయి. గత 24 గంటల్లో 1,65,553 కేసులు, 3,460 మరణాలు నమోదయ్యాయి. రెండు లక్షలకు దిగువన కొత్త కేసులు నమోదు కావడం వరుసగా ఇది మూడోరోజు. ఇంతవరకు మొత్తంగా కేసుల సంఖ్య 2.79 కోట్లకు చేరువ కాగా, మహమ్మారి బారిన పడి 3,25,972 మంది ప్రాణాలు కోల్పోయారు. మరణాల రేటు 1.17 శాతంగా ఉంది. రోజువారీ మరణాలు గత ఐదు రోజుల కంటే తక్కువ నమోదయ్యాయి.

రోజువారీ పాజిటివిటీ రేటు వరుసగా 6వ రోజు 10%లోపు నమోదైంది. ఒక్క రోజులో 2,76,309 మంది కోలుకోగా రివకరీ రేటు 91.25%కి పెరిగింది. క్రియాశీలక కేసుల సంఖ్య మరింత తగ్గి 21,14,508 (7.58%)కి చేరింది. దేశవ్యాప్తంగా శనివారం 20,63,839 కొవిడ్‌ నిర్ధారణ పరీక్షలు జరిపారు. ఇంతవరకు జరిపిన పరీక్షల సంఖ్య 34.31 కోట్లు దాటింది. దేశంలో ఆదివారం ఉదయం 8 గంటల సమయానికి 21,20,66,614 కొవిడ్‌ టీకా డోసులు వేశారు. గత 24 గంటల్లో 30,35,749 టీకాలు పంపిణీ చేశారు.