Gadkari: డ్రోన్లతో ప్రయాణించే రోజు ఇంకెంతో దూరంలేదు.. గడ్కరీ

నాగ్‌పుర్‌: కేంద్ర ఉపరితల రవాణాశాఖ మంత్రి నితిన్‌ గడ్కరీ(Nitin Gadkari) ఆసక్తికర వ్యాఖ్యలు చేశారు. డ్రోన్లు (ఎయిర్‌ ట్యాక్సీలు)పై మనం ప్రయాణించే రోజు ఇంకెంతో దూరం లేదన్నారు. మహారాష్ట్రలోని నాగ్‌పుర్‌లో రాష్ట్రనిర్మాణ్‌ సమితి ఆధ్వర్యంలో ‘అఖండ్‌ భారత్‌ సంకల్ప్‌ దినోత్సవం’ పేరిట నిర్వహించిన కార్యక్రమంలో ఆయన పాల్గొన్నారు. ఈ సందర్భంగా గడ్కరీ మాట్లాడుతూ.. ప్రస్తుతం రైతులు ఎరువుల వినియోగానికి డ్రోన్లు ఉపయోగిస్తున్నారని.. అలాగే, 200 కిలోల బరువు కలిగిన వస్తువులను సైతం రవాణా చేసేందుకు వీటిని వాడుతున్నట్టు చెప్పారు . ఈ నేపథ్యంలోనే మనం రైల్వే స్టేషన్‌ లేదా ఎయిర్‌ పోర్టులకు వెళ్లేందుకు డ్రోన్ల(ఎయిర్‌ ట్యాక్సీలు)ను ఉపయోగించే రోజులు ఇంకెంతో దూరం లేవంటూ వ్యాఖ్యానించారు.  దేశ సరిహద్దులను కాపాడుకొనేందుకు, గ్రామలను అభివృద్ధి బాటలో నిలిపేందుకు సాంకేతికతను వినియోగించుకోవాలని విద్యార్థులను ఆయన కోరారు.