భారత్‌లో మరిన్ని దీర్ఘకాల కరవులు

 భూతాపంతో తప్పని పరిణామం

 మరో అయిదు దేశాల్లోనూ ఇంతే

దిల్లీ: భూతాపం కారణంగా భారతదేశంలో మరింత ఎక్కువగా, దీర్ఘకాలం పాటు కరవు తప్పదని తాజా పరిశోధన వెల్లడించింది. భారత్‌తో పాటు చైనా, ఇథియోపియా, ఘనా, బ్రెజిల్, ఈజిప్ట్‌ లాంటి దేశాల్లో ఉష్ణోగ్రతలు 1.5 డిగ్రీల సెల్సియస్‌ పెరిగినా పరిణామాలు తీవ్రంగా ఉంటాయని యూకేలోని యూనివర్సిటీ ఆఫ్‌ ఈస్ట్‌ యాంగ్లియా (యూఈఏ) పరిశోధకులు తెలిపారు. క్లైమాటిక్‌ ఛేంజ్‌ అనే పత్రికలో ఈ వ్యాసం ఇటీవల ప్రచురితమైంది. ఉష్ణోగ్రత 3 డిగ్రీల సెల్సియస్‌ పెరిగితే ఈ దేశాల్లోని వ్యవసాయ భూమి దాదాపు సగానికి పైగా రాబోయే 30 ఏళ్ల కాలంలో ఏడాది పాటు తీవ్ర కరవు బారిన పడుతుందని యూఈఏలో బయోడైవర్సిటీ అండ్‌ క్లైమేట్‌ ఛేంజ్‌ విభాగం అసోసియేట్‌ ప్రొఫెసర్‌ జెఫ్‌ ప్రైస్‌ తెలిపారు. భారతదేశంలో 50 శాతం, బ్రెజిల్, చైనా, ఈజిప్ట్, ఇథియోపియా, ఘనా దేశాల్లో 80 నుంచి 100 శాతం జనాభా తీవ్ర కరవు బారిన పడుతుందన్నారు. అదే సమయంలో, ప్యారిస్‌ ఒప్పందంలో చెప్పినట్లుగా ఉష్ణోగ్రతలను పారిశ్రామిక యుగం నాటి స్థాయి కంటే 1.5 డిగ్రీల సెల్సియస్‌ మాత్రమే ఎక్కువ ఉండేలా పరిమితం చేస్తే ఈ ఆరు దేశాల్లోనూ అందరికీ మంచి ప్రయోజనాలు ఉంటాయని వివరించారు. మిగిలిన 5 దేశాల కంటే ఈజిప్టులో భూతాపం కొద్దిగా పెరిగినా కరవు తీవ్రత చాలా ఎక్కువగా ఉంటుందని పరిశోధకులు అంచనా వేశారు. భారత్, చైనాలో ఎక్కువ భూమి మంచుతో కప్పి ఉందని, అయితే భూతాపం 3 డిగ్రీల సెల్సియస్‌ పెరిగితే ఇందులో చాలా భూమి దీర్ఘకాలంపాటు కరవు బారిన పడుతుందని హెచ్చరించారు.