The Great Khali: అభిమానుల చర్యకు ఏడ్చేసిన ‘ది గ్రేట్‌ ఖలీ’

ఇంటర్నెట్‌ డెస్క్‌: వరల్డ్ రెజ్లింగ్ ఎంటర్‌టైన్‌మెంట్(డబ్ల్యూడబ్ల్యూఈ)లో భారతీయుల ప్రస్తావన వస్తే ఠక్కున గుర్తొచ్చే పేరు ‘ది గ్రేట్‌ ఖలీ’. హిమాచల్‌ ప్రదేశ్‌కు చెందిన దలీప్‌ సింగ్‌ రానా డబ్ల్యూడబ్ల్యూఈతో ది గ్రేట్‌ ఖలీగా భారత్‌తోపాటు విదేశాల్లోనూ పేరుగాంచారు. ఆయన పలు బాలీవుడ్‌, హాలీవుడ్‌ సినిమాల్లోనూ మెరిశారు. పలు ప్రకటనల్లోనూ నటించారు. అయితే అభిమానులు ఫొటోగ్రాఫర్ల చర్యతో కన్నీళ్లు ఈ మాజీ రెజ్లర్‌ కన్నీళ్లు పెట్టుకున్న ఓ వీడియో ఇంటర్నెట్‌లో వైరల్‌గా మారింది.

ఖలీ ఓ ఇంట్లో నుంచి బయటకు వస్తుండగా ఒక్క ఫోజు ఇవ్వాలంటూ వీడియో గ్రాఫర్లు, ఫొటో గ్రాఫర్లు అడిగారు. అక్కడ ఆయన అభిమానులు కూడా ఉన్నారు. వారి అభ్యర్థన మేరకు ముందుకు వచ్చి నవ్వుతూ ఫొటోలకు ఫోజులిచ్చిన గ్రేట్‌ ఖలీ ఉన్నట్టుండి భావోద్వేగానికి గురయ్యాడు. కళ్ల నీళ్లు తుచుకుంటూ లోపలికి వెళ్లాడు. ఈ పరిణామంతో అక్కడివారు ఆశ్చర్యానికి గురయ్యారు. అయితే, ఆ అభిమానానికి కన్నీళ్లు వచ్చాయా? లేదంటే ఆ గుంపులో ఉన్నవారు ఏమైనా అన్నందుకు నొచ్చుకొని ఉంటాడా? అన్నది తెలియరాలేదు. ఈ ఘటనకు సంబంధించిన వీడియో ఒకటి వైరల్‌గా మారింది.