రేపు మహిళలకు ఉచిత ప్రవేశం!

దిల్లీ: అంతర్జాతీయ మహిళా దినోత్సవాన్ని పురస్కరించుకుని కేంద్ర సాంస్కృతిక శాఖ మహిళలకు ఓ శుభవార్త చెప్పింది. భారత పురావస్తు విభాగం పరిధిలో ఉండే అన్ని ప్రాచీన కట్టడాలను రేపు ఉచితంగా సందర్శించే అవకాశాన్ని కల్పిస్తున్నట్లు ప్రకటించింది. ఈ మేరకు సాంస్కృతిక మంత్రిత్వ శాఖ ఓ ప్రకటనలో వెల్లడించింది. ‘మార్చి 8న భారత ఆర్కియాలాజికల్‌ విభాగం పరిధిలో ఉండే ప్రాచీన కట్టడాల సందర్శనకు మహిళలకు ఎలాంటి ఫీజు ఉండదు. రేపు ఒక్కరోజు స్త్రీలు వాటిని ఉచితంగా సందర్శించవచ్చు’ అని  మంత్రిత్వ శాఖ పేర్కొంది.  ఈ సందర్భంగా ఆ శాఖ మంత్రి ప్రహ్లాద్‌ పటేల్‌ మాట్లాడుతూ.. ‘అంతర్జాతీయ మహిళా దినోత్సం జరుపుకోవడానికి ముందే మన దేశంలో స్త్రీలను పూజించే ఆచారం ఉందన్నారు. స్త్రీలను దేవతలతో పూజించడం మన సంప్రదాయం. ఈ నిర్ణయం తీసుకోవడం గొప్ప ముందడుగు’ అని ఆయన అభివర్ణించారు. ప్రాచీన కట్టడాల వద్ద బేబీ ఫీడింగ్‌ గదుల ఏర్పాటు చేస్తామని మంత్రి ఇటీవల ప్రకటించిన విషయం తెలిసిందే.