యూఏఈలో ఉన్నవారి కోసం రంగంలోకి నావికాదళం!

కొచ్చి: కొవిడ్‌-19 నియంత్రణలో భాగంగా విధించిన ఆంక్షల వల్ల వివిధ దేశాల్లో చిక్కుకుపోయిన భారతీయుల్ని స్వదేశానికి తీసుకొచ్చేందుకు కేంద్ర ప్రభుత్వం ప్రయత్నాల్ని ముమ్మరం చేసింది. అందులో భాగంగా యునైటెడ్‌ అరబ్‌ ఎమిరేట్స్‌(యూఏఈ), మాల్దీవుల్లో చిక్కుకుపోయిన వారిని తీసుకొచ్చేందుకు నావికాదళం రంగంలోకి దిగింది. ఐఎన్‌ఎస్‌ జలశ్వ, ఐఎన్‌ఎస్‌ మగర్‌ మాల్దీవులకు వెళ్లగా.. ఐఎన్‌ఎస్‌ శార్దూల్‌ దుబాయ్‌ దిశగా వెళ్లింది. సోమవారం రాత్రి ఇవి బయలుదేరినట్లు భారత నావికాదళానికి చెందిన అధికార ప్రతినిధి తెలిపారు. తిరిగి ఇవి కొచ్చికి చేరుకోనున్నట్లు వెల్లడించారు. ఐఎస్‌ఎస్‌ మగర్‌, ఐఎస్‌ఎస్‌ శార్దూల్‌ దక్షిణ నావికా దళానికి, ఐఎస్‌ఎస్‌ జలశ్వ తూర్పు నావికాదళానికి చెందినవి.