కోర్టు కాంప్లెక్స్‌ను పేల్చేస్తామని లేఖలు

అప్రమత్తమైన చండీగఢ్‌ పోలీసులు
ఉత్తిదేనని తేలడంతో ఊపిరి పీల్చుకున్న అధికారులు

చండీగఢ్‌: కోర్టు భవనాల్ని పేల్చేస్తామంటూ చండీగఢ్‌ జిల్లా, పంచకుల కోర్టులకు వచ్చిన బాంబు బెదిరింపు లేఖలు కలకలం సృష్టించాయి. న్యాయమూర్తి కాంప్లెక్స్‌లో బాంబు పెట్టామని.. మంగళవారం మధ్యాహ్నం ఒంటి గంటకు పేలుతుందని చెప్పారు. సమాచారం అందుకున్న పోలీసులు అప్రమత్తమయ్యారు. కోర్టు పరిసరాల్లో ఉన్న వారందరినీ బయటకు పంపించి.. తమ ఆధీనంలోకి తీసుకున్నారు. బాంబు నిర్వీర్య బృందం, డాగ్‌ స్క్వాడ్‌ ఘటనా స్థలానికి చేరుకుని తనిఖీలు చేపట్టాయి. కోర్టు ప్రాంగణంలో తనిఖీలు నిర్వహించిన పోలీసులు ఒక టిఫిన్‌ బాక్సును గుర్తించారు. అయితే అందులో ఎలాంటి పేలుడు పదార్థాలు లభించలేదని స్పష్టంచేశారు. ఇదంతా ఉత్తిదేనని తేలడంతో అందరూ ఊపిరి పీల్చుకున్నారు. కోర్టులను పేల్చేస్తామని బాంబు బెదిరింపు లేఖ తమకు వచ్చిందని ఏసీపీ సురేంద్ర యాదవ్‌ చెప్పారు. దీనిపై కేసు నమోదు చేసుకుని దర్యాప్తు చేస్తున్నట్లు పేర్కొన్నారు. గణతంత్ర దినోత్సవం నేపథ్యంలో ఈ ఘటన జరగడం భయాందోళనలకు గురిచేస్తోంది. మొదట మాక్‌ డ్రిల్‌ అని చెప్పిన పోలీసులు.. తర్వాత బాంబు బెదిరింపు లేఖ వచ్చినట్లు తెలిపారు.