చిన్నారి ప్రాణం నిలబెట్టేందుకు రూ.పదకొండు కోట్లు.. పేరు చెప్పకుండా అకౌంట్‌లోకి..

అరుదైన వ్యాధితో బాధపడుతున్న 16 నెలల చిన్నారి చికిత్స కోసం ఓ వ్యక్తి ఏకంగా రూ.11 కోట్లు ఖాతాలో జమ చేశారు. విదేశాల్లో ఉంటున్న ఆయన తన పేరు చెప్పకుండా ఈ విరాళం అందజేశారు. కేరళలోని ఎర్నాకుళానికి చెందిన నౌకాదళ అధికారి సారంగ్‌, అతిథి దంపతుల కుమారుడు నిర్వాణ్‌(16 నెలలు) పుట్టిన 15 నెలల తర్వాత కూడా కాళ్లు కదపలేదు. నిర్వాణ్‌కు స్పైనల్‌ మస్క్యులర్‌ అట్రోఫీ (ఎస్‌ఎంఏ) టైప్‌-2 అనే వ్యాధి ఉన్నట్లు వైద్యులు గుర్తించారు.

రెండేళ్లు నిండకుండా కొన్ని రకాల ఔషధాలు వాడితేనే చికిత్సకు  వీలవుతుందని, వీటిని అమెరికా నుంచి తెప్పించేందుకు  రూ.17.5 కోట్లు ఖర్చవుతుందని చెప్పారు. ఆ చిన్నారి కుటుంబం ఆర్థిక సహాయం కోసం అభ్యర్థించగా.. బాబు ఖాతాలోకి విరాళాలు రావడం మొదలయ్యాయి. ఈ క్రమంలోనే తన పేరు చెప్పకుండా ఓ వ్యక్తి రూ.11 కోట్లు జమచేశారు. దీంతో సారంగ్‌ దంపతుల ఆర్థిక కష్టాలు దాదాపు ఓ కొలిక్కి వచ్చినట్లైంది. మరో రూ.80 లక్షలు వస్తే నిర్వాణ్‌ చికిత్సకు సరిపడా డబ్బులు సమకూరినట్లే.