అనాయాస మరణానికి అనుమతివ్వండి

రాష్ట్రపతికి జ్ఞానవాపి మసీదు కేసులోని ప్రధాన పిటిషనర్‌ లేఖ

వారణాసి(యూపీ): అనాయాస మరణానికి అనుమతి కోరుతూ జ్ఞానవాపి-శృంగార్‌ గౌరీ కేసులో ప్రధాన పిటిషనర్‌ రాఖీసింగ్‌.. రాష్ట్రపతి ద్రౌపదీ ముర్ముకు బహిరంగ లేఖ రాయడం కలకలం సృష్టిస్తోంది. 2021 ఆగస్టులో మసీదు ప్రాంగణంలోని శృంగార్‌ గౌరీ విగ్రహాన్ని రోజూ పూజ చేసుకొనేందుకు అనుమతివ్వాలంటూ రాఖీసింగ్‌.. మరో నలుగురు హిందూ మహిళలతో కలిసి వారణాసి న్యాయస్థానంలో పిటిషన్‌ వేశారు. అయితే ఇప్పుడు ఆ నలుగురు మహిళలు తనను వేధిస్తున్నారని, తాను కేసు నుంచి ఉపసంహరించుకుంటున్నట్లు దుష్ప్రచారం చేస్తున్నారని రాఖీసింగ్‌ లేఖలో వాపోయారు. కేసు ఉపసంహరణపై తాను గానీ.. తన మావయ్య జితేంద్రసింగ్‌ విసేన్‌ గానీ ఎలాంటి ప్రకటన చేయలేదని అన్నారు. తనకు అనాయాస మరణం పొందేందుకు అనుమతి ఇవ్వాలని కోరారు. శుక్రవారం తొమ్మిది గంటలలోపు రాష్ట్రపతి నుంచి సమాధానం రాకపోతే.. ఆ తర్వాత తన నిర్ణయం తాను తీసుకుంటానని రాఖీసింగ్‌ చెప్పారు. వేధింపులు, వనరులు లేమి ఇతర కారణాలతో జ్ఞానవాపి కేసు నుంచి తాను, తన కుటుంబసభ్యులు వైదొలగుతున్నట్లు విసేన్‌ గత వారం ప్రకటించారు.