అధిక పింఛను దరఖాస్తు గడువు పొడిగింపు

దిల్లీ: ఉద్యోగుల భవిష్య నిధి చందాదారుల అధిక పింఛను ఉమ్మడి ఆప్షన్‌ దరఖాస్తు గడువును ఈపీఎఫ్‌వో మరోసారి పొడిగించింది. తొలుత మే 3వ తేదీతో ఆన్‌లైన్‌ దరఖాస్తు గడువు ముగియగా.. జూన్‌ 26 వరకూ పొడిగించింది. తాజాగా ఆ గడువూ తీరిపోవడంతో మరోసారి జులై 11వ తేదీ వరకూ పొడిగిస్తూ ఈపీఎఫ్‌వో నిర్ణయం తీసుకుంది. దీంతో మిగిలిపోయినవారు ఆన్‌లైన్‌లో దరఖాస్తు చేసుకునేందుకు మరింత సమయం లభించింది. ఇదే చివరి అవకాశమని, 15 రోజుల గడువిచ్చామని ఈపీఎఫ్‌వో వెల్లడించింది. అర్హులైన వారికి అధిక పింఛను ఇవ్వాల్సిందేనని 2022 నవంబరు 4వ తేదీన సుప్రీంకోర్టు ఆదేశించిన నేపథ్యంలో ఈపీఎఫ్‌వో ఈ దరఖాస్తులను స్వీకరిస్తోంది.