జులై 13నే చంద్రయాన్‌-3 ప్రయోగం.. ఇస్రో ఛైర్మన్‌ అధికారిక ప్రకటన

దిల్లీ: జాబిల్లిపై అన్వేషణకు చంద్రయాన్‌-3ను ఈ నెల 13న ప్రయోగించనున్నట్లు భారత అంతరిక్ష పరిశోధన సంస్థ (ఇస్రో) ఛైర్మన్‌ ఎస్‌. సోమ్‌నాథ్‌ సోమవారం అధికారికంగా వెల్లడించారు. ఈసారి చందమామ ఉపరితలంపై ల్యాండర్‌ను విజయవంతంగా దించుతామన్న విశ్వాసం తమకు ఉందని చెప్పారు. చంద్రయాన్‌-3 ప్రయోగ తేదీపై ఇటీవల అనధికారిక వార్తలు వచ్చిన విషయం తెలిసిందే. అప్పట్లో వాటిపై స్పందించిన సోమ్‌నాథ్‌.. తేదీని ఇంకా నిర్ణయించలేదని తెలిపారు. తాజాగా దీనిపై దిల్లీలో మీడియాతో మాట్లాడిన ఆయన.. ‘‘జులై 13-19 వరకు లాంచ్‌ విండో అందుబాటులో ఉంది. తొలి రోజే ప్రయోగం చేపట్టాలని భావిస్తున్నాం’’ అని వెల్లడించారు.