విద్యార్థిని నీటి సీసాలో మూత్రం పోసిన విద్యార్థులు

రాజస్థాన్‌లోని ఓ పాఠశాలలో అకృత్యం

జైపుర్‌: రాజస్థాన్‌లో ఓ అనాగరిక ఘటన చోటుచేసుకుంది. తోటి విద్యార్థిని తాగు నీటి సీసాలో కొందరు విద్యార్థులు మూత్రం పోశారు. ఓ ప్రేమ లేఖ రాసి ఆమె పుస్తకాల సంచిలో పెట్టారు. భిల్వాడా జిల్లా లుహారియాలో ఈ అమానుషం జరిగింది. పోలీసుల వివరాల ప్రకారం.. లుహారియా గ్రామంలోని ప్రభుత్వ పాఠశాలలో ఓ బాలిక చదువుతోంది. అదే పాఠశాలకు చెందిన కొందరు బాలురు గత శుక్రవారం ఆమె మంచి నీటి సీసాలో మూత్రం కలిపారు. అంతేకాదు ‘లవ్‌ యూ’ అని రాసిన ఓ పేపర్‌ను కూడా ఆమె సంచిలో పెట్టి వెళ్లారు. ఇవేమీ తెలియని బాలిక ఆ సీసాలోని నీటిని తాగింది. దుర్వాసన వస్తుండటం గ్రహించి పాఠశాల యాజమాన్యానికి ఫిర్యాదు చేసింది. తన పుస్తకాల సంచిలో ఓ ప్రేమలేఖ కూడా ఉన్నట్లు వారికి తెలిపింది. ఈ విషయం తన దృష్టికి వచ్చినా.. ప్రధానోపాధ్యాయుడు చర్యలు తీసుకోలేదు. బాలిక ఇంటి వద్ద ఈ విషయం తెలియడంతో ఆగ్రహించిన కుటుంబ సభ్యులు సోమవారం పాఠశాలకు వెళ్లి ఆందోళన చేపట్టారు. తహసీల్దార్‌, పోలీసులు, ప్రిన్సిపల్‌ దృష్టికి ఈ దురాగతాన్ని తీసుకెళ్లారు. అధికారుల నుంచి సరైన స్పందన రాకపోవడంతో నిందితుల ఇళ్లపై రాళ్ల దాడి చేశారు. ‘‘విద్యార్థిని పోలీసులకు అధికారికంగా ఇంకా ఫిర్యాదు చేయలేదు. నిందితుల ప్రాంతంలోకి ప్రవేశించి రాళ్ల దాడి చేసిన వ్యక్తులపై ఫిర్యాదు చేస్తే పోలీసులు తగిన చర్యలు తీసుకుంటారు’’ అని ఏఎస్పీ ఘనశ్యామ్‌ శర్మ చెప్పారు.