25 కేజీల బంగారంతో పట్టుబడ్డ అఫ్గాన్‌ దౌత్యవేత్త

జకియా వార్ధక్‌ రాజీనామా

దిల్లీ: భారత్‌లోని అఫ్గానిస్థాన్‌ సీనియర్‌ దౌత్యవేత్త జకియా వార్ధక్‌ ఇటీవల ముంబయి విమానాశ్రయంలో 25 కేజీల బంగారాన్ని అక్రమంగా తరలిస్తూ డైరెక్టరేట్‌ ఆఫ్‌ రెవెన్యూ ఇంటెలిజెన్స్‌ (డీఆర్‌ఐ) అధికారులకు పట్టుబడ్డారు. దాదాపు రూ.18.6 కోట్ల విలువైన ఈ బంగారాన్ని ఆమె దుబాయ్‌ నుంచి భారత్‌కు తన వస్త్రాల్లో తరలించారని.. తనిఖీల్లో ఈ విషయం బయటపడిందని అధికారులు పేర్కొన్నారు. దౌత్యపరమైన మినహాయింపు కారణంగా ఆమెను అదుపులోకి తీసుకోలేదని డీఆర్‌ఐ తెలిపింది. గత నెల 25న జరిగిన ఈ ఘటన తాజాగా వెలుగులోకి వచ్చింది. ఈ నేపథ్యంలో తన పదవికి రాజీనామా చేస్తున్నట్లు జకియా వార్ధక్‌ శనివారం  ఓ ప్రకటనలో తెలిపారు.