దిల్లీలో హింస నేపథ్యంలో 550 ట్విటర్‌ ఖాతాల తొలగింపు

దిల్లీ: భారత గణతంత్ర దినోత్సవం సందర్భంగా దేశ రాజధాని దిల్లీలో చెలరేగిన హింస నేపథ్యంలో దాదాపు 550 ఖాతాలను ట్విటర్‌ తొలగించింది. బుధవారం ఈ విషయాన్ని ట్విటర్‌ అధికార ప్రతినిధి ధ్రువీకరించారు. రైతుల ట్రాక్టర్‌ ర్యాలీ హింసాత్మకంగా మారటం, తదనంతర పరిణామాలపై అసంబద్ధ సందేశాలతో ట్విటర్‌ వేదికను దుర్వినియోగపరచిన వినియోగదారులపై ఈ చర్య తీసుకొన్నట్టు తెలిపారు. ‘మేము గట్టి వైఖరినే తీసుకున్నాం. అసంబద్ధ సందేశాలు, విద్వేష ప్రసంగాలు, బెదిరింపులు ఉద్రిక్తతలు పెంచుతాయి. కాబట్టి, మా వాణిజ్య సూత్రాలకు విరుద్ధంగా ప్రవర్తించినవారి ఖాతాలు తొలగించాం’ అని వివరించారు. ఇటీవల అమెరికా అధ్యక్ష ఎన్నికల సందర్భంలోనూ ఇలాగే వ్యవహరించినట్టు తెలిపారు.