Covid Vaccine: పిల్లల కోసం మరో కరోనా టీకా

కొవోవ్యాక్స్‌ అత్యవసర వినియోగానికి డీసీజీఐ అనుమతి

దిల్లీ: పిల్లలకు సంబంధించి మరో కరోనా టీకా అత్యవసర వినియోగానికి భారత ఔషధ నియంత్రణ సంస్థ(డీసీజీఐ) అనుమతి ఇచ్చింది. 12 నుంచి 17 సంవత్సరాల పిల్లల కోసం కొన్ని షరతులతో సీరం ఇన్‌స్టిట్యూట్‌ ఆఫ్‌ ఇండియా తయారు చేసిన కొవోవ్యాక్స్‌ అత్యవసర వినియోగానికి డీసీజీఐ పచ్చజెండా ఊపినట్లు అధికార వర్గాలు తెలిపాయి. భారత్‌లో 18 ఏళ్ల లోపు పిల్లలకు అందుబాటులోకి వచ్చిన నాలుగో వ్యాక్సిన్‌గా కొవోవ్యాక్స్‌ నిలవనుంది. ఇదిలా ఉంటే.. 15 ఏళ్లలోపు వారికి వ్యాక్సిన్‌ వేసే విషయంలో ప్రభుత్వం ఇంకా ఎలాంటి నిర్ణయం తీసుకోలేదని ఇప్పటికే కేంద్ర ఆరోగ్య మంత్రిత్వ శాఖ స్పష్టం చేసింది. దీనిపై మరింత అధ్యయనం జరపాల్సిన అవసరం ఉందని పేర్కొంది.