ఆరోగ్య సంరక్షకులు ఆశా వర్కర్లు: మోదీ

దిల్లీ: ప్రపంచ ఆరోగ్య సంస్థ(డబ్ల్యూహెచ్‌వో) నుంచి గ్లోబల్‌ హెల్త్‌ లీడర్స్‌ పురస్కారానికి ఎంపికైన ఆశా వర్కర్ల బృందాన్ని ప్రధాని మోదీ అభినందించారు. ఆరోగ్య భారత్‌కు వాళ్లు రక్షకులని ప్రశంసించారు. భారత్‌కు చెందిన 10 లక్షల మంది ఆశా వర్కర్లు కొవిడ్‌-19 విజృంభణ సమయంలో మారుమూల గ్రామీణ ప్రాంతాల్లోనూ అద్భుతమైన వైద్య సేవలను అందించినందుకు గాను గ్లోబల్‌ హెల్త్‌ లీడర్స్‌ అవార్డును డబ్లూహెచ్‌వో డైరెక్టర్‌ జనరల్‌ ప్రకటించారు. జెనీవాలో ఆదివారం నిర్వహించిన కార్యక్రమంలో భారత రాయబార కార్యాలయ ప్రతినిధి సీమా పుజానీ ఈ పురస్కారాన్ని అందుకున్నారు.

వేతనాలు పెంచాలి: విపక్ష నేతలు

ఆశా వర్కర్లకు వేతనాలు పెంచడంతో పాటు పని పరిస్థితులను మెరుగుపరచాలని విపక్ష నేతలు కేంద్ర ప్రభుత్వాన్ని డిమాండ్‌ చేశారు. ఆశా వర్కర్లకు గౌరవప్రదమైన జీవితాన్ని గడిపే అర్హత వారికి ఉందని కాంగ్రెస్‌ నేతలు రాహుల్‌ గాంధీ, ప్రియాంక ట్వీట్‌ చేశారు. ఆశా వర్కర్లను గౌరవప్రదంగా చూడాలని కేంద్రానికి సీపీఐ(ఎం) ప్రధాన కార్యదర్శి సీతారాం ఏచూరి సూచించారు.