Train: ఈ రైలు నిమిషాలు, గంటలు కాదు.. ఏడాది ఆలస్యం!

మన దేశంలో రైళ్ల రాకపోకలు ఆలస్యమవడం సాధారణమే. నిర్ణీత సమయం కంటే కొన్ని నిమిషాలు/గంటల తేడాలో అవి గమ్యస్థానానికి చేరుకుంటుంటాయి! అందులో పెద్ద ఆశ్చర్యమేమీ లేదు. కానీ తాజాగా ఝార్ఖండ్‌లోని తన గమ్యస్థానానికి చేరుకున్న ఓ గూడ్సు రైలు గురించి తెలిస్తే మాత్రం ఎవరైనా నోరెళ్లబెట్టాల్సిందే. ఎందుకంటే దాని రాక ఏకంగా ఏడాది ఆలస్యమైంది.. ఇది నిజం. 2021 మేలో ఛత్తీస్‌గఢ్‌లోని ఓ రైల్వేస్టేషన్‌లో ఒక రైలు బోగిని వెయ్యి బియ్యం బస్తాలతో నింపారు. 762 కిలోమీటర్లు ప్రయాణించి ఝార్ఖండ్‌లోని న్యూ గిరిడీ స్టేషన్‌ను అది చేరుకోవాలి. సాంకేతిక కారణాలతో అది నిర్ణీత సమయానికి ముందుకు కదలలేదు. తర్వాత దాన్ని ఎవరూ పట్టించుకోలేదు. ఆ బోగితో గూడ్సు రైలు ఎట్టకేలకు ఏడాది ఆలస్యంగా ఈ నెల 17న న్యూ గిరిడీ స్టేషన్‌ను చేరుకుంది. ఏడాది ఆలస్యం కావడంతో.. 200-300 బస్తాల బియ్యం పాడైపోయిందని అధికారులు తెలిపారు. దీనిపై దర్యాప్తునకు ఆదేశించారు.