‘స్వచ్ఛ’ ధ్రువీకరణకు సవరించిన మార్గదర్శకాలు

దిల్లీ: ఆరుబయట మలవిసర్జన రహితమైన ప్రదేశాలుగా పట్టణ ప్రాంతాలు కొనసాగేలా చూసి, పారిశుద్ధ్యం పరంగా నూతన లక్ష్యాలను చేరుకునే ఉద్దేశంతో స్వచ్ఛభారత్‌ ధ్రువీకరణకు కేంద్ర గృహ నిర్మాణ- పట్టణ వ్యవహారాల మంత్రిత్వశాఖ కొన్ని మార్గదర్శకాలను సవరించింది. స్వచ్ఛభారత్‌ మిషన్‌ (ఎస్‌బీఎం) మొదలైన ఏడేళ్లలో లక్షల మంది పౌరులు, ముఖ్యంగా మహిళలు, పిల్లలకు హుందాతనాన్ని, భద్రతను తీసుకురాగలిగామని తెలిపింది. శుద్ధి చేయకుండా మురుగునీటిని బయటకు వదిలిపెట్టరాదని, శుద్ధి చేసిన నీటిని గరిష్ఠస్థాయిలో పునర్వినియోగించాలని లక్షలోపు జనాభా ఉన్న నగరాలన్నింటికీ సూచించింది. పరిశుభ్రమైన నగర భారతాన్ని సాధించడానికి మౌలిక సదుపాయాల పరంగా ఎలాంటి వసతులు సమకూర్చుకోవాలో తాజా మార్గదర్శకాల్లో పేర్కొంది.