Cheetah: చీతాల నామకరణానికి సూచనల వెల్లువ

‘మన్‌ కీ బాత్‌’లో ప్రధాని పిలుపునకు స్పందన

దిల్లీ: మిల్ఖా.. చేతక్‌.. గౌరి.. వీర్‌.. భైరవ్‌. నమీబియా నుంచి సెప్టెంబరు 17న మధ్యప్రదేశ్‌లోని కునో జాతీయ పార్కుకు చేరిన చీతాల నామకరణానికి ప్రజల నుంచి వస్తున్న సూచనలివి. తన జన్మదినం సందర్భంగా 8 చీతాలను కునో పార్కులో వదిలిన ప్రధానమంత్రి నరేంద్ర మోదీ వాటికి పేర్లను సూచించమని ప్రజలను కోరిన విషయం తెలిసిందే. గత ఆదివారం ‘మన్‌ కీ బాత్‌’ రేడియో కార్యక్రమంలో మాట్లాడుతూ పేర్లు పంపాలని కోరిన మోదీ మళ్లీ మంగళవారం మరోమారు ఈ విజ్ఞప్తి చేశారు. ‘మైగవ్‌’ వేదికకు పంపిన పేర్ల నుంచి విజేతలను ఎంపిక చేసి కునో జాతీయ పార్కులో చీతాల  సందర్శనకు అనుమతిస్తారు. ఈ పోటీకి పేర్లు పంపేందుకు చివరి తేదీ అక్టోబర్‌ 26. ప్రజల నుంచి ఇప్పటిదాకా 750 సూచనలు అందాయి.