లాలూకు మూత్రపిండ మార్పిడి శస్త్రచికిత్స విజయవంతం

తనయుడు తేజస్వీ యాదవ్‌ వెల్లడి

పట్నా: ఆర్జేడీ అధ్యక్షుడు లాలూ ప్రసాద్‌ యాదవ్‌కు సోమవారం సింగపూర్‌లో మూత్రపిండ మార్పిడి శస్త్రచికిత్స విజయవంతంగా జరిగిందని ఆయన కుమారుడు, బిహార్‌ ఉప ముఖ్యమంత్రి తేజస్వీ యాదవ్‌ తెలిపారు. 74 ఏళ్ల లాలూకు ఆయన కుమార్తె రోహిణి ఆచార్య ఓ మూత్రపిండాన్ని దానం చేశారు. శస్త్రచికిత్స అనంతరం ఇద్దరూ ఆరోగ్యంగా ఉన్నారని తేజస్వీ యాదవ్‌ సంతోషం వ్యక్తంచేశారు. శస్త్ర చికిత్స విజయవంతం కావడంతో తన తండ్రిని ఆపరేషన్‌ థియేటర్‌ నుంచి ఐసీయూకి మార్చారని వెల్లడించారు. తన తండ్రి, సోదరిల కోసం ప్రార్థించిన వారందరికీ ధన్యవాదాలు తెలుపుతూ ట్వీట్‌ చేశారు. ఆసుపత్రిలో లాలూ ఉన్న వీడియోను ట్వీట్‌కు జత చేశారు.