Gadkari: రహదారి ప్రమాద మరణాల్ని 50% తగ్గించడమే కేంద్రం టార్గెట్‌!

కేంద్రమంత్రి నితిన్‌ గడ్కరీ

దిల్లీ: దేశంలో జరుగుతున్న రోడ్డు ప్రమాదాల్లో మరణాల్ని నివారించడంపై కేంద్రం దృష్టిసారించిందని కేంద్ర ఉపరితల రవాణా శాఖ మంత్రి నితిన్‌ గడ్కరీ తెలిపారు. 2024 నాటికి రోడ్డు ప్రమాద మరణాల్ని 50శాతం తగ్గించడమే లక్ష్యంగా పెట్టుకున్నట్టు వెల్లడించారు. దిల్లీలో నిన్న జరిగిన కార్యక్రమంలో మాట్లాడిన ఆయన.. రహదారుల భద్రత అనేది చాలా తీవ్రమైన అంశమని పేర్కొన్నారు. రోడ్డు ప్రమాదాల్ని నివారించడమే లక్ష్యంగా పనిచేయాలని.. బ్లాక్‌ స్పాట్‌ (రోడ్డు ప్రమాదాలు అధికంగా జరిగే ప్రాంతాలను బ్లాక్‌ స్పాట్‌లుగా పేర్కొంటారు)లపై తక్షణమే చర్యలు తీసుకోవాలన్నారు. ప్రాంతీయ అధికారులు, ప్రాజెక్టు డైరెక్టర్లు రహదారులపై ప్రమాదాల నివారణను ఓ ప్రతిజ్ఞలా తీసుకోవాలని సూచించారు. రహదారి భద్రతకు సంబంధించిన సమస్యల్ని సమష్టిగా పరిష్కరించేందుకు వీలుగా వాహనదారులకు అవగాహన కల్పించాలని ఈ సందర్భంగా గడ్కరీ సూచించారు.