Savarkar పాఠం తీసివేత.. ‘న్యూటన్‌’ సిద్ధాంతంతో సావర్కర్‌ మనవడి కౌంటర్‌

పనాజీ: స్కూల్‌ పాఠ్యాంశాల నుంచి హిందూ సిద్ధాంతరకర్త వీర్‌ సావర్కర్‌ (V D Savarkar) పాఠం తొలగిస్తూ కర్ణాటక ప్రభుత్వం (Karnataka Govt) తీసుకున్న నిర్ణయం వివాదాస్పదమైంది. దీనిపై కాషాయ నేతలు తీవ్రంగా మండిపడుతున్నారు. ఈ అంశంపై తాజాగా సావర్కర్‌ మనవడు రంజిత్‌ సావర్కర్‌ (Ranjit Savarkar) స్పందిస్తూ.. ‘న్యూటన్‌’ సిద్ధాంతంతో సిద్ధరామయ్య సర్కారుకు కౌంటర్‌ ఇచ్చారు. ఈ చర్యకు ప్రతిచర్య తప్పదని హెచ్చరించారు.

‘‘పాఠ్యాంశాలను తొలగిస్తే విద్యార్థులు సావర్కర్‌ గురించి తెలుసుకునే అవకాశం ఉండదని కాంగ్రెస్‌ భావించిందేమో..! కానీ, విద్యార్థులు చాలా తెలివైన వారు. సామాజిక మాధ్యమాలు, ఆన్‌లైన్‌లో సావర్కర్‌పై చాలా సమాచారం అందుబాటులో ఉంది. సావర్కర్‌ స్మారక్‌ కూడా తమ వెబ్‌సైట్‌లో ఆ సమాచారాన్ని ఉంచింది. అందువల్ల పాఠాలను తొలగించినంత మాత్రాన ఏ తేడా ఉండదు. వాస్తవానికి.. మీరు దేన్నైనా ఎంత అణచివేయాలనుకుంటే.. అది అంత బలంగా పుంజుకుంటుందనేది సహజం. మనం చేసే ప్రతీ చర్యకు అదే స్థాయిలో ప్రతిచర్య ఉంటుంది’’ అని రంజిత్‌ సావర్కర్‌ (Ranjit Savarkar) కాంగ్రెస్‌ (Congress) సర్కారుపై విమర్శలు గుప్పించారు.

ఇదీ చదవండి: కాషాయ హంగులకు చెల్లు

గత భాజపా ప్రభుత్వ హయాంలో తీసుకొచ్చిన అనేక విధానాలను సిద్ధరామయ్య సర్కారు సవరించే పనిలో పడిన విషయం తెలిసిందే. ఇందులో భాగంగానే మతం, కులాన్ని ప్రత్యేకించి బోధించే విద్యా విధానాన్ని సమూలంగా మార్చాలని నిర్ణయించింది. 6 నుంచి 10వ తరగతి వరకు పాఠ్యపుస్తకాల్లో ఏదేని హిందుత్వ విధానాలను ప్రచారం చేసే అంశాలుంటే వాటిని తొలగించాలని తీర్మానించింది.  హిందూ మహాసభ నేత వి.డి.సావర్కర్‌ (Savarkar), ఆర్‌ఎస్‌ఎస్‌ వ్యవస్థాపకుడు హెడ్గేవార్‌, నాయకుడు సొలిబెలె చక్రవర్తి పాఠాలను కూడా తొలగించాలని ఇటీవల కేబినెట్‌ సమావేశంలో నిర్ణయించింది. అయితే ఇది విమర్శలకు దారితీసింది.