Vande Bharat Express: కేరళలో వందే భారత్‌ రైలుపై మరోసారి రాళ్ల దాడి

తిరువనంతపురం: కేంద్ర ప్రభుత్వం ప్రతిష్టాత్మకంగా ప్రవేశపెట్టిన వందే భారత్‌ రైళ్ల (Vande Bharat Express)పై ఆకతాయిలు రాళ్ల దాడికి పాల్పడుతున్నారు. తాజాగా కేరళ (Kerala)లోని కాసర్‌గోడ్‌ నుంచి తిరువనంతపురం వెళుతున్న వందే భారత్‌ రైలుపై గుర్తుతెలియని వ్యక్తులు మరోసారి రాళ్లతో దాడి చేశారని కేరళ పోలీసులు తెలిపారు. ఈ ఘటనలో రైలు అద్దాలు పాక్షికంగా దెబ్బతిన్నట్లు పోలీసులు పేర్కొన్నారు. రైలు వాలపట్టణం-కన్నూర్‌ మధ్య ఉండగా మధ్యాహ్నం 3:30 గంటల ప్రాంతంలో ఈ దాడి జరిగినట్లు రైల్వే అధికారులు వెల్లడించారు. దాడి జరిగినట్లు గుర్తించిన వెంటనే పోలీసులకు సమాచారం అందించినట్లు తెలిపారు.

ఈ ఘటనపై రైల్వే అధికారుల ఫిర్యాదు మేరకు కేసు నమోదు చేసిన పోలీసులు దర్యాప్తు చేపట్టారు. కేరళలో రెండు వారాల వ్యవధిలో ఇది రెండో ఘటన. ఏప్రిల్‌ 25న ప్రధాని మోదీ (PM Narendra Modi) తిరువనంతపురం-కాసరగోడ్ మధ్య వందే భారత్‌ రైలును ప్రారంభించారు. తర్వాతి వారంలోనే రైలు తిరునవయ-తిరూర్‌ మధ్య ఉండగా గుర్తు తెలియని వ్యక్తులు రాళ్లతో దాడి చేశారు. ఈ ఘటనలో కోచ్‌ అద్దం ధ్వంసమైంది. దీనిపై కేసు నమోదు చేసిన పోలీసులు దర్యాప్తు చేపట్టారు. వందే భార‌త్ రైళ్లపై తరచుగా రాళ్ల దాడులు జరుగుతుండటంతో భద్రత కట్టుదిట్టం చేస్తామని రైల్వే అధికారులు తెలిపారు. గతంలో పలుచోట్ల వందే భారత్‌ రైలుపై రాళ్లదాడి ఘటనలు వెలుగులోకి వచ్చిన విషయం తెలిసిందే.