Modi: విమానాశ్రయానికి వచ్చి, మోదీని స్వయంగా ఆహ్వానించిన డెన్మార్క్ ప్రధాని

దిల్లీ: మూడు రోజుల ఐరోపా పర్యటనలో భాగంగా ప్రధాని మోదీ డెన్మార్క్ చేరుకున్నారు. ఈ క్రమంలో రాజధాని నగరం కోపెన్‌హాగెన్‌ విమానాశ్రయంలో దిగిన మోదీని డెన్మార్క్‌ ప్రధాని మెట్టే ఫ్రెడ్రిక్సెన్ స్వయంగా ఆహ్వానించారు. మన పద్ధతిలో మోదీ మొదట నమస్కారం చేయగా.. ఆమె ప్రతి నమస్కారం చేశారు. అనంతరం కరచాలనం చేసుకున్నారు. ఈ ఆహ్వానాన్ని ఉద్దేశిస్తూ.. ‘ప్రత్యేక సంజ్ఞ’ అంటూ భారత విదేశాంగ ప్రతినిధి అరిందమ్ బాగ్చి ట్వీట్ చేశారు. 

‘డెన్మార్క్ ప్రధాని నుంచి వచ్చిన ఈ ప్రత్యేక సంకేతం చూడటానికి అద్భుతంగా ఉంది. వీరిద్దరు ప్రధాని అధికారిక నివాసంలో చర్చలు జరిపారు. వారి మధ్య ఉన్న సానుకూలత.. భారత్, డెన్మార్క్ మధ్య సన్నిహిత సంబంధాలకు అద్దం పడుతోంది’ అంటూ పలు చిత్రాలను షేర్ చేశారు. కాగా, ఈ ఇరువురు నేతలు రెండు దేశాల సంబంధాలను బలోపేతం చేసే దిశగా చర్చలు జరిపినట్లు తెలుస్తోంది. మూడు రోజుల పర్యటనలో భాగంగా మోదీ నిన్న జర్మనీకి వెళ్లారు. ప్రస్తుతం డెన్మార్క్‌లో ఉన్న ఆయన.. రేపు ఫ్రాన్స్‌ వెళ్లి, భారత్‌కు తిరిగిరానున్నారు.