Passport: కవర్‌ ఆర్డర్‌ చేస్తే పాస్‌పోర్ట్‌ వచ్చింది!

కోజికోడ్‌: కేరళకు చెందిన ఓ వ్యక్తికి ఈ-కామర్స్‌ సైట్‌ ద్వారా వింత అనుభవం ఎదురైంది. పాస్‌పోర్ట్‌ పెట్టుకునేందుకు ఓ కవర్‌ కోసం ఆర్డర్‌ పెడితే.. ఆ కవర్‌తో పాటు ఓ పాస్‌పోర్ట్‌ కూడా వచ్చింది. ఈ ఘటన వయనాడ్‌ జిల్లా కనియమ్‌బెట్టాలో జరిగింది. మిథున్‌ బాబు గత నెల 30న ఈ కామర్స్‌ వెబ్‌సైట్‌లో ఓ పాస్‌పోర్ట్‌ కవర్‌ను ఆర్డర్‌ చేశాడు. ఈ నెల 1న అతడి ఆర్డర్‌ డెలివరీ అయింది. పార్సిల్‌ తెరిచి చూస్తే అందులో మరో వ్యక్తికి చెందిన పాస్‌పోర్ట్‌ కూడా ఉంది. అతను కస్టమర్‌ కేర్‌కు ఫోన్‌ చేయగా.. వారు ఇచ్చిన సమాధానంతో మిథున్‌ ఆశ్చర్యపోయాడు. ఈ తప్పిదం మరోసారి జరగదని.. విక్రయదారుడికి దీనిపై హెచ్చరిస్తామంటూ చెప్పి ఫోన్‌ పెట్టేశారు. దీనిపై స్థానిక ఠాణాలో మిథున్‌ ఫిర్యాదు చేశాడు. ఆ పాస్‌పోర్టు త్రిస్సూర్‌కు చెందిన మహ్మద్‌ సాలిహ్‌కు చెందినదిగా గుర్తించారు. ముందుగా ఆ కవర్‌ను సాలిహ్‌ ఆర్డర్‌ చేశాడని.. అందులో తన పాస్‌పోర్ట్‌ పెట్టి సరిచూసుకొని అది నచ్చకపోవడంతో దానిని రిటర్న్‌ చేశాడని అతడి భార్య అస్మాబీ తెలిపారు. ఈ క్రమంలో తన కుమారుడు ఆ కవర్‌ నుంచి పాస్‌పోర్టు తీయలేదని ఇది తమ తప్పిదమని పేర్కొన్నారు.