Taliban: తాలిబన్లకు తలవంచని పంజ్‌షేర్‌.. ఆయుధాలు వీడేందుకు ససేమిరా

కాబుల్‌: అఫ్గానిస్థాన్‌లో తమకు ఇప్పటికీ కొరకరాని కొయ్యగా ఉన్న పంజ్‌షేర్‌ను ఎలాగైనాసరే ఆక్రమించుకోవాలని తాలిబన్లు ప్రయత్నిస్తున్నారు. ఇటీవల ఆ ప్రావిన్సుపై దాడికి దిగినప్పుడు ఎదురుదెబ్బ తగలడంతో.. తాజాగా వారు చర్చల బాట పట్టారు. పర్వాన్‌ ప్రాంతంలో పంజ్‌షేర్‌ నేతలు, పలువురు ఇతర గిరిజన తెగల ప్రతినిధులతో సంప్రదింపులు జరిపారు. ఆయుధాలు వీడి తమతో చేతులు కలపాలని పంజ్‌షేర్‌ ఫైటర్లకు విజ్ఞప్తి చేశారు. అయితే వారి చర్చలు విఫలమయ్యాయి. తాలిబన్‌ అధికార ప్రతినిధి ముల్లా ఆమిర్‌ ఖాన్‌ ముత్తా స్వయంగా ఈ విషయాన్ని వెల్లడించారు. మరోవైపు- అఫ్గాన్‌ను తాలిబన్లు ఆక్రమించుకున్నప్పటి నుంచి జరిగిన పోరాటాల్లో ఇప్పటివరకు తాము దాదాపు 350 మంది తాలిబన్‌ ముఠా సభ్యులను హతమార్చినట్లు పంజ్‌షేర్‌ ఫైటర్లు ప్రకటించారు. మరో 40 మందిని బంధించినట్లు ట్విటర్‌ వేదికగా వెల్లడించారు.