Supreme Court: ఆ 40 అంతస్తుల టవర్లను కూల్చేయండి: సుప్రీంకోర్టు ఆదేశం 

దిల్లీ: ఉత్తర్‌ప్రదేశ్‌లో నోయిడాలోని అక్రమ ఇళ్ల నిర్మాణంపై సుప్రీంకోర్టు తీవ్ర ఆగ్రహం వ్యక్తం చేసింది. 40 అంతస్తుల జంట భవనాలను (ట్విన్ టవర్స్‌) కూల్చివేయాలని మంగళవారం ఆదేశాలు ఇచ్చింది. నోయిడా అధికారుల పర్యవేక్షణలో మూడు నెల్లల్లోగా ఈ ప్రక్రియను పూర్తిచేయాలని తేల్చిచెప్పింది. దీనిపై గతంలో అలహాబాద్ హైకోర్టు ఇచ్చిన తీర్పును సమర్థించింది. రియల్‌ ఎస్టేట్‌ సంస్థ సూపర్ టెక్‌ ఆధ్వర్యంలో ఈ నిర్మాణం జరిగింది. 

భవన నిర్మాణంలో నిబంధనలు ఉల్లంఘించారంటూ దాఖలైన పిటిషన్లను ఇద్దరు సభ్యుల సుప్రీం ధర్మాసనం ఈ రోజు విచారించింది. ఈ అక్రమ భవన నిర్మాణాన్ని తప్పుబట్టింది. ఈ నిర్మాణం విషయంలో నోయిడా అధికారులు, నిర్మాణ సంస్థ మధ్య కుదిరిన ఒప్పందాన్ని ప్రశ్నించింది. డెవలపర్లు, పట్టణ ప్రణాళిక అధికారుల సహకారంతో పట్టణ  ప్రాంతాల్లో అనధికారిక నిర్మాణాల సంఖ్య పెరిగిందని, దీనిపై కఠినంగా వ్యవహరించాలని హితవు పలికింది. ఈ ప్రాజెక్టులో ఇళ్లు కొనుగోలు చేసిన వారికి రెండు నెలల్లో చెల్లింపులు చేయాలని ఆదేశించింది. అలాగే కూల్చివేత ప్రక్రియను మూడు నెలల్లోగా పూర్తి చేయాలని, ఆ ఖర్చు మొత్తాన్ని సూపర్‌టెక్ భరించాలని ఆదేశాలు జారీ చేసింది. రెండు టవర్లలో దాదాపు వెయ్యి ప్లాట్లు ఉండగా.. ప్లాట్లు కొన్న వారందరికీ 12 శాతం వడ్డీతో నగదు తిరిగి చెల్లించాలని సర్వోన్నత న్యాయస్థానం ఆదేశించింది.