Section 66A: కేంద్ర హోంశాఖ కీలక నిర్ణయం

దిల్లీ: కేంద్ర హోంశాఖ బుధవారం కీలక నిర్ణయం తీసుకుంది. ఇన్‌ఫర్మేషన్‌ టెక్నాలజీ యాక్ట్‌ -2000 సెక్షన్‌ 66ఎ కింద నమోదైన కేసులను ఎత్తివేయాలని నిర్ణయించింది. రాష్ట్రాలు కేంద్ర పాలిత ప్రాంతాలకు ఈ మేరకు హోంశాఖ ఆదేశాలు జారీ చేసింది. సెక్షన్‌ 66ఎ కింద కొత్తగా కేసులు నమోదు చేయవద్దని ఆదేశించింది.

ఐటీ చట్టంలోని సెక్షన్‌ 66ఏను రద్దు చేస్తూ 2015లో సుప్రీంకోర్టు తీర్పు వెలువరించింది. తీర్పు వెలువడి ఆరేళ్లు కావస్తున్నా ఆ సెక్షన్‌ కింద దేశవ్యాప్తంగా పలు చోట్ల కేసులు నమోదు కావడంపై ఇటీవల సుప్రీంకోర్టు ఆగ్రహం వ్యక్తంచేసింది. కేంద్రానికి నోటీసులు జారీ చేసింది. ఈ నేపథ్యంలో హోంశాఖ తాజా నిర్ణయం తీసుకుంది. సుప్రీం తీర్పు తర్వాత దేశవ్యాప్తంగా 11 రాష్ట్రాల్లో 1307 కేసులు నమోదు కాగా.. ఈ విషయంలో మహారాష్ట్ర అగ్రస్థానంలో నిలిచింది. ఉభయ తెలుగు రాష్ట్రాల్లోనూ 50కి పైగా కేసులు నమోదు కావడం గమనార్హం.