Bhediya: ఇది నయం కాకపోతే మనుషుల్ని తింటూనే ఉంటా.. ఆసక్తికరంగా ‘భేడియా’ ట్రైలర్‌

ముంబయి: ప్రమాదవశాత్తు ఓ వ్యక్తి తోడేలుగా మారడం వల్ల ఎలాంటి ఇబ్బందులు ఎదుర్కొన్నాడు? అతడు మళ్లీ సాధారణమైన మనిషిగా మారాడా? లేదా? అనే ఆసక్తికర అంశాలతో రూపుదిద్దుకున్న చిత్రం ‘భేడియా’ (Bhediya). వరుణ్‌ ధావన్‌ (Varun Dhawan) - కృతిసనన్‌ (Kriti Sanon) జంటగా నటించిన ఈ చిత్రం నవంబర్‌ 25న ప్రేక్షకుల ముందుకు రానుంది. ఈ నేపథ్యంలో చిత్రబృందం బుధవారం ‘భేడియా’ ట్రైలర్‌ విడుదల చేసింది. తోడేలుగా మారిన వ్యక్తిగా వరుణ్‌ ధావన్‌ నటన ఆకట్టుకునేలా ఉంది. ఉదయం పూట సాధారణమైన యువకుడిగా కనిపిస్తూనే రాత్రి వేళల్లో తోడేలుగా మారి, ఇతరులపై దాడి చేయడం వంటి సన్నివేశాలతో ఈ ట్రైలర్‌ ఆసక్తికరంగా సాగింది. ‘‘ప్రతిరోజూ రాత్రి నేను ఏం చేస్తున్నానో నాక్కూడా తెలియదు. ఒక తోడేలు నా శరీరాన్ని స్వాధీనం చేసుకుంటుంది. ఉన్నట్టుండి డ్రాకులా వంటి పదునైన కోరలు, పంజా.. తోక కూడా వస్తుంది. ఒకవేళ నాకు నయం కాకపోతే నేను మనుషులను తింటూనే ఉంటా’’ అంటూ వరుణ్‌ ధావన్‌ చెప్పే సంభాషణలు ఆకట్టుకునేలా ఉన్నాయి. అమర్‌ కౌశిక్‌ ఈచిత్రానికి దర్శకత్వం వహించారు.