Ram: వారియర్‌ వేగం

రామ్‌ నటిస్తున్న చిత్రం ‘ది వారియర్‌’. లింగుస్వామి దర్శకుడు. శ్రీనివాసా చిట్టూరి నిర్మాత. కృతి శెట్టి కథానాయిక. ఆది పినిశెట్టి, అక్షరా గౌడ కీలక పాత్రలు పోషిస్తున్నారు. తెలుగు, తమిళ భాషల్లో రూపొందుతోన్న ఈ ద్విభాషా చిత్రం జులై 14న ప్రేక్షకుల ముందుకు రానుంది. శనివారంతో దీని చిత్రీకరణ   పూర్తయింది. ఈ విషయాన్ని చిత్ర బృందం సామాజిక మాధ్యమాల ద్వారా ప్రకటించింది. ఈ సందర్భంగా నిర్మాత మాట్లాడుతూ.. ‘‘మా సంస్థలో ప్రతిష్ఠాత్మకంగా    నిర్మిస్తున్న చిత్రమిది. కథ పరంగా, సాంకేతికంగా అత్యున్నతంగా ఉంటుంది. ఇందులో రామ్‌ సత్య అనే ఐపీఎస్‌ అధికారిగా కనిపిస్తారు. వారం రోజులుగా ఆయనపై పరిచయ గీతాన్ని తెరకెక్కించాం. దీనికి శేఖర్‌ మాస్టర్‌ నృత్యరీతులు సమకూర్చారు. ప్రస్తుతం నిర్మాణాంతర, రీరికార్డింగ్‌ పనుల్ని ప్రారంభించాం. త్వరలో మిగిలిన పాటల్ని విడుదల చేస్తాం’’ అన్నారు. సంగీతం: దేవిశ్రీ ప్రసాద్‌, కూర్పు: నవీన్‌ నూలి, మాటలు: సాయి  మాధవ్‌ బుర్రా, ఛాయాగ్రహణం: సుజీత్‌ వాసుదేవ్‌.