సత్తి నవ్విస్తాడు

హృదయాల్ని హత్తుకునే భావోద్వేగాలతోపాటు... డార్క్‌ కామెడీని మేళవించి రూపొందిన మా చిత్రం తప్పకుండా ప్రేక్షకులకు నచ్చుతుందన్నారు జగదీష్‌ ప్రతాప్‌ భండారి. ‘పుష్ప’ సినిమాలో అల్లు అర్జున్‌కి స్నేహితుడిగా నటించి ప్రేక్షకుల్ని మెప్పించిన నటుడీయన. ఇటీవల ‘సత్తిగాని రెండెకరాలు - ఛాప్టర్‌ 1’ అనే సినిమాలో ప్రధాన పాత్రధారిగా నటించారు. అభినవ్‌ దర్శకత్వం వహించారు. మైత్రీ మూవీ మేకర్స్‌ నిర్మించింది. వెన్నెల కిషోర్‌, అనీషా దామా, బిత్తిరి సత్తి, మోహనశ్రీ సురాగ తదితరులు ఇతర పాత్రలు పోషించారు. ఈ నెల 26న ఓటీటీ వేదిక ఆహాలో ప్రసారం కానున్న ఈ సినిమా ట్రైలర్‌ విడుదల కార్యక్రమం బుధవారం హైదరాబాధ్‌లో జరిగింది. అనుదీప్‌, సత్యదేవ్‌, హను రాఘవపూడి, అనీష్‌ కురువిల్లా, వెంకీ కుడుముల, సుహాస్‌ తదితర సినీ ప్రముఖులు ఈ వేడుకలో పాల్గొన్నారు. ట్రైలర్‌ ఆసక్తికరంగా ఉందని, చిత్రం విజయంవంతం కావాలని ఆకాంక్షించారు. కథ, కథనాలు ప్రేక్షకుల్ని కట్టిపడేసేలా ఉంటాయని, సినిమాలోని సత్తి నవ్విస్తాడని చిత్రవర్గాలు తెలిపాయి.