రెండు చిత్రాలు.. రెండు విరామాలు... ఒక్కడే హీరో

ఎంత గొప్ప సినిమా అయినా ఏకధాటిగా కూర్చొని ప్రేక్షకులు చూడలేరు. ఇంటర్వెల్‌ తప్పనిసరి. సినిమా నిడివిని బట్టి విరామం ఇస్తుంటారు. కానీ భారతీయ సినిమా చరిత్రలో ఓ రెండు సినిమాలకు మాత్రం ఎక్కువ నిడివి కారణంగా రెండు సార్లు ఇంటర్వెల్‌ ఇచ్చారు. మరో విశేషం ఏంటంటే ఈ రెండు చిత్రాల్లోనూ కథానాయకుడు రాజ్‌కపూర్‌. రెండింటికీ దర్శకుడు కూడా ఆయనే. అవే ‘సంగం’, ‘మేరా నామ్‌ జోకర్‌’ చిత్రాలు. ‘సంగం’ సినిమా 3 గంటల 58నిమిషాలు, ‘మేరా నామ్‌ జోకర్‌’ 4 గంటల 15 నిమిషాల నిడివితో ప్రేక్షకుల ముందుకొచ్చాయి. ఈ సినిమాతోనే రాజ్‌కపూర్‌ తనయుడు ప్రముఖ నటుడు రిషికపూర్‌ తెరకు పరిచయం అయ్యారు. సాధారణంగా రాజ్‌కపూర్‌ సినిమాల్లో పాటలన్నీ లతా మంగేష్కర్‌ ఆలపించేవారు. కానీ ఈ సినిమాలో ఆమె సోదరి ఆశా భోంస్లే పాడారు. రాజ్‌కపూర్‌ నిర్ణయం ఎలాంటిదైనా ఈ చిత్రంలోని ‘జీనా యహా మర్నా యహా’ పాట నేటికీ వినిపిస్తూనే ఉంటుంది.