Aliabhatt: రాజమౌళిని అన్‌ఫాలో చేసిన ఆలియా.. నిజమెంత..?

ఇంటర్నెట్‌డెస్క్‌: రాజమౌళి తెరకెక్కించిన బిగ్గెస్ట్‌ బ్లాక్‌బస్టర్‌ ‘ఆర్‌ఆర్‌ఆర్‌’ (RRR)తో తెలుగు ప్రేక్షకులకు పరిచయమయ్యారు బాలీవుడ్‌ నటి ఆలియాభట్‌. అయితే.. ఈ సినిమా విడుదలైన తర్వాత ఆలియా.. రాజమౌళిపై ఆగ్రహంగా ఉన్నారని పలు ఆంగ్ల పత్రికల్లో వార్తలు చక్కర్లు కొడుతున్నాయి. దీంతో ఈ వార్తలు ఇప్పుడు నెట్టింట హాట్‌ టాపిక్‌గా మారాయి. ఇంతకీ ఈ వార్తల్లో నిజమెంత..?

‘ఆర్‌ఆర్‌ఆర్‌’లో సీతగా నటించి మెప్పించారు ఆలియా. ఇందులో రామ్‌చరణ్‌కు జోడీగా ఓ కీలకపాత్ర పోషించారు. అసలైన కథ కూడా ఈమె ద్వారానే రివీల్‌ అవుతుంది. ఇదిలా ఉండగా..  సినిమా విడుదలైన తర్వాత స్క్రీన్‌స్పేస్‌ విషయంలో ఆలియా అసంతృప్తి చెందారనీ.. ఒలీవియాతో పోలిస్తే తన పాత్ర చాలా తక్కువగా ఉందని ఆమె ఫీలయ్యారనీ.. ఆ కోపంతోనే ఇన్‌స్టా వేదికగా రాజమౌళిని అన్‌ఫాలో చేశారని వార్తలు వచ్చాయి. అంతేకాకుండా ఈ చిత్రానికి సంబంధించిన ఫొటోలను సైతం ఆమె ఇన్‌స్టా నుంచి తొలగించిందని ఆ వార్తల్లో రాసుకొచ్చారు. నిజం చెప్పాలంటే.. ఆ వార్తలు వాస్తవం కాదు. ఎందుకంటే ఆమె ఇన్‌స్టా ఖాతాని చెక్‌ చేస్తే.. ఆమె ఫాలో అయ్యే 475 మందిలో రాజమౌళి, తారక్‌, చరణ్‌ ముగ్గురూ ఉన్నారు. అలాగే ఆమె ఖాతాలో ‘ఆర్‌ఆర్‌ఆర్‌’ పోస్టర్లు, రాజమౌళితో సెట్స్‌లో దిగిన ఫొటోలు అన్నీ ఉన్నాయి.