Jayeshbhai Jordaar: సర్పంచ్‌ కొడుకుగా రణ్‌వీర్‌ .. ‘జయేష్‌భాయ్‌ జోర్దార్’ ట్రైలర్‌ చూశారా!

ఇంటర్నెట్‌ డెస్క్‌: రణ్‌వీర్‌సింగ్‌ హీరోగా దివ్యాంగ్‌ థక్కర్‌ తెరకెక్కించిన చిత్రం ‘జయేష్‌భాయ్‌ జోర్దార్‌’. షాలినీ పాండే కథానాయిక. ఈ సినిమా మే 13న ప్రేక్షకుల ముందుకురానుంది. ఈ సందర్భంగా చిత్ర బృందం మంగళవారం ట్రైలర్‌ను విడుదల చేసింది. మద్యం సేవించి కొందరు బాలురు ఇబ్బంది పెడుతున్నారని, దీనిపై తగిన చర్యలు తీసుకోవాలంటూ ఓ బాలిక సర్పంచ్‌కు విన్నవించే సీన్‌తో ప్రారంభమైన ఈ వీడియో ఆద్యంతం ఆసక్తిగా సాగింది. సర్పంచ్‌గా బొమన్‌ ఇరానీ, ఆయన కొడుకు జోర్దార్‌గా రణ్‌వీర్‌, కోడలిగా షాలినీ కనిపించారు. ఊరందరికీ తీర్పునిచ్చే ఆ సర్పంచ్‌.. తన కొడుక్కి రెండోసారి ఆడపిల్ల పుడుతుందని తెలిస్తే ఏం చేశాడు? అనే కథాంశంతో ఈ చిత్రం రూపొందినట్టు, నవ్వులు పంచుతూనే సందేశం ఇవ్వబోతున్నట్టు ట్రైలర్‌లోని సన్నివేశాలు తెలియజేస్తున్నాయి. మనీషా శర్మ నిర్మించిన ఈ చిత్రానికి విశాల్‌- శేఖర్‌ సంగీతం అందించారు.