Prabhas: ప్రభాస్‌ కోసం మరో అందం

ఓవైపు ‘సలార్‌’.. మరోవైపు ‘ప్రాజెక్ట్‌ కె’ చిత్రాలతో క్షణం తీరిక లేకుండా గడుపుతున్నారు కథానాయకుడు ప్రభాస్‌ (Prabhas). తాజాగా ఈ జాబితాలోకి మారుతి చిత్రం కూడా వచ్చి చేరిన సంగతి తెలిసిందే. పీపుల్స్‌ మీడియా ఫ్యాక్టరీ సంస్థ నిర్మిస్తున్న చిత్రమిది. ఇందులో ప్రభాస్‌కు జోడీగా ముగ్గురు కథానాయికలు సందడి చేయనున్నారు. ఇప్పటికే వీటిలో రెండు పాత్రల కోసం నిధి అగర్వాల్‌, మాళవికా మోహనన్‌ పేర్లను ఖరారు చేశారు. కాగా, ఇప్పుడు మూడో నాయికగా రిద్ది కుమార్‌ను (Riddhi Kumar) ఎంపిక చేశారని సమాచారం. ‘లవర్‌’ సినిమాతో తెలుగు తెరకు పరిచయమైంది రిద్ది. ప్రభాస్‌ గత చిత్రం ‘రాధేశ్యామ్‌’లో ఓ కీలక పాత్ర పోషించింది. ఇప్పుడు ఆయనకు జోడీగా కనిపించే అవకాశం దక్కించుకుంది. ఇప్పటికే ఓ చిన్న షెడ్యూల్‌ చిత్రీకరణ పూర్తి చేసుకున్న ఈ సినిమా.. త్వరలో మరో కొత్త షెడ్యూల్‌ను ప్రారంభించుకోనుంది.