Laal Singh Chaddha: ‘లాల్‌సింగ్‌ చడ్డా’ వీక్షించిన సీఎం మాన్‌.. ఏమన్నారంటే?

చండీగఢ్‌: ప్రముఖ బాలీవుడ్‌ కథానాయకుడు ఆమిర్‌ ఖాన్‌ (Aamir Khan) ప్రధాన పాత్రలో నటించిన చిత్రం ‘లాల్‌ సింగ్‌ చడ్డా’. ఈ సినిమాను పంజాబ్‌ సీఎం భగవంత్‌ మాన్‌ ఆదివారం వీక్షించారు. పరస్పర సోదరభావంతో మెలగాలన్న సందేశాన్నిచ్చేలా  ఈ ఈ చిత్రం ఉందని ఆయన మెచ్చుకున్నారు. యువ హృదయాల్లో విద్వేష బీజాలు నాటనివ్వదని పేర్కొన్నారు. ఈ చిత్రం చూసిన భగవంత్‌ మాన్‌.. హీరో ఆమిర్‌ ఖాన్‌, ఆ చిత్ర బృందానికి అభినందనలు తెలిపారు.

లాల్‌సింగ్‌ చడ్డా చిత్రాన్ని చూసే అవకాశం నాకు ఈరోజు లభించింది. ఈ సినిమా పరస్పర సోదరభావాన్ని పెంపొందించేదిగా ఉంది. అలాగే, యువ హృదయాల్లో విద్వేషాలకు చోటివ్వదు. ఆమిర్‌ ఖాన్‌, ఆయన బృందానికి నా అభినందనలు

- ట్వీట్‌లో సీఎం మాన్‌

1994లో విడుదలైన ‘ఫారెస్ట్ గంప్‌’కి (Forrest Gump) రీమేక్‌గా ‘లాల్‌సింగ్‌ చడ్డా’ చిత్రాన్ని తెరకెక్కించిన సంగతి తెలిసిందే. అద్వైత్‌ చందన్‌ తెరకెక్కించిన ఈ చిత్రంలో కరీనా కపూర్, నాగ చైతన్య, మోనా సింగ్‌ తదితరులు కీలక పాత్రల్లో నటించారు.