Telangana News: ఒవైసీ మెప్పుకోసమే కేటీఆర్‌ అలా మాట్లాడుతున్నారు: లక్ష్మణ్‌

హైదరాబాద్‌: మత రాజకీయాలు నడుపుతున్నారంటూ తమపై మంత్రి కేటీఆర్‌ ఆరోపణలు చేస్తున్నారని.. ఎంఐఎం అధ్యక్షుడు అసదుద్దీన్‌ ఒవైసీ మెప్పుకోసమే ఆయన అలా మాట్లాడుతున్నారని భాజపా ఓబీసీ మోర్చా జాతీయ అధ్యక్షుడు లక్ష్మణ్‌ విమర్శించారు. హిందువులపై దాడులు జరుగుతుంటే తెరాస ప్రభుత్వం చోద్యం చూస్తోందని ఆయన ఆరోపించారు.

నాంపల్లిలోని భాజపా రాష్ట్ర కార్యాలయంలో నిర్వహించిన మీడియా సమావేశంలో లక్ష్మణ్‌ మాట్లాడారు. ఒవైసీ డైరెక్షన్‌లోనే తెరాస ప్రభుత్వం నడుస్తోందని ఆయన వ్యాఖ్యానించారు. పాతబస్తీలో మజ్లిస్‌ ప్రాబల్యం ఉన్న ప్రాంతాలకు వెళ్లి తనిఖీలు చేయలేని దుస్థితి తెరాస ప్రభుత్వానిదని విమర్శించారు.