Harbhajan Singh: సిద్ధూతో హర్భజన్‌ సింగ్‌.. కాంగ్రెస్‌లో చేరేందుకేనా?

చండీగఢ్‌: ప్రముఖ క్రికెటర్‌ హర్భజన్‌ సింగ్‌ రాజకీయాల్లోకి అడుగుపెట్టబోతున్నారా? తాజాగా కనబడుతున్న పరిణామాలు అవుననే సమాధానామే చెబుతున్నాయి. హర్భజన్‌ నేడు పంజాబ్‌ కాంగ్రెస్‌ చీఫ్‌ నవజోత్‌ సింగ్‌ సిద్ధూను కలిశారు. ఇందుకు సంబంధించిన ఫొటోను సిద్ధూ ట్విటర్‌ వేదికగా పంచుకుంటూ.. ‘సాధ్యమయ్యే పరిస్థితులు కన్పిస్తున్న ఫొటో’ అని రాసుకొచ్చారు. దీంతో కాంగ్రెస్‌లోకి భజ్జీ చేరిక ఖాయమనే ఊహాగానాలు వినిపిస్తున్నాయి. అసెంబ్లీ ఎన్నికల కోసం పంజాబ్‌ కాంగ్రెస్‌ ప్రచార కమిటీ నేడు సమావేశం కానుంది. దీనికి కొద్ది గంటల ముందు సిద్ధూ - భజ్జీ భేటీ జరగడం ప్రాధాన్యత సంతరించుకుంది.

మరికొన్ని నెలల్లో పంజాబ్‌ అసెంబ్లీ ఎన్నికలు జరగనున్న వేళ క్రికెటర్లు హర్భజన్‌ సింగ్‌, యువరాజ్‌ సింగ్‌లపై ప్రధాన పార్టీలు దృష్టి పెట్టినట్లు గత కొంతకాలంగా ఊహాగానాలు వినిపిస్తున్నాయి. వీరిద్దరూ త్వరలోనే భాజపాలో చేరుతారంటూ ఇటీవల ఓ వార్త నెట్టింట్లో తెగ చక్కర్లు కొట్టింది. అయితే ఈ వార్తను భజ్జీ ఖండించారు. అది ఫేక్‌ న్యూస్‌ అని కొట్టిపారేశారు. తాజాగా సిద్ధూను కలవడంతో ఆయన కాంగ్రెస్‌లో చేరతారని ప్రచారం మొదలైంది. మరి దీనిపై భజ్జీ ఎలా స్పందిస్తారో చూడాలి..!