అభివృద్ధి పనుల కోసం వైకాపా ఎంపీటీసీ సభ్యుడి రాజీనామా!

తెనాలి టౌన్‌, న్యూస్‌టుడే: గుంటూరు జిల్లా తెనాలి మండల ప్రజాపరిషత్తు కార్యాలయంలో ఆదివారం జరిగిన సర్వసభ్య సమావేశం వాడివేడిగా సాగింది. సమావేశంలో కొలకలూరు-2 వైకాపా ఎంపీటీసీ సభ్యుడు కాలిశెట్టి ఫణికుమార్‌ మాట్లాడుతూ.. గ్రామంలో ఎలాంటి అభివృద్ధి పనులు జరగటం లేదని, తీర్మానాలు చేసిన పనులు కూడా మొదలుపెట్టలేదని విమర్శించారు. ఇందుకు తాను కారణం కాకూడదని భావిస్తూ రాజీనామా చేస్తున్నానని తెలిపారు. రాజీనామా పత్రాన్ని ఎంపీపీ చెన్నుబోయిన శ్రీనివాసరావుకు ఇచ్చారు. వచ్చే నెల 1లోగా పనులు ప్రారంభిస్తామని ఎంపీపీ చెప్పారు. దీంతో స్పందించిన ఎంపీటీసీ సభ్యుడు గడువులోగా పనులు ప్రారంభం కాకుంటే తన రాజీనామాను పరిగణనలోకి తీసుకోవాలని సమావేశం నుంచి వెళ్లిపోయారు. చేసిన పనులకు బిల్లులు రాకుంటే పనులు ఎలా చేస్తామని తేలప్రోలు సర్పంచి బాషా పేర్కొన్నారు. తాను గ్రామంలో రూ.15 లక్షల పనులు చేయిస్తే బిల్లులు చేయటానికి కమీషన్లు అడుగుతున్నారంటూ ఆగ్రహం వ్యక్తం చేశారు. అధికారులతో మాట్లాడతానంటూ ఎంపీపీ ఆయనను సముదాయించారు. గ్రామాల్లో పనులు కావటం లేదని, ప్రజల సమస్యలు పరిష్కరించలేకపోతున్నామని పలువురు ఎంపీటీసీ సభ్యులు, సర్పంచులు వాపోయారు.