లక్షల మంది తరలివచ్చి కూటమిని ఆశీర్వదించారు

‘ప్రజాగళం’పై నరసాపురం ఎంపీ రఘురామకృష్ణరాజు

ఈనాడు, దిల్లీ: చిలకలూరిపేటలో భాజపా, తెదేపా, జనసేన కూటమి ఆధ్వర్యంలో నిర్వహించిన భారీ బహిరంగ సభ వంటిది ఈ దశాబ్దంలో చూడలేదని జనం చెబుతున్నారని నరసాపురం ఎంపీ రఘురామకృష్ణరాజు పేర్కొన్నారు. సభకు లక్షలాదిగా ప్రజలు తరలివచ్చి కూటమిని ఆశీర్వదించారన్నారు. రచ్చబండ కార్యక్రమంలో భాగంగా తన నివాసంలో సోమవారం ఆయన విలేకర్లతో మాట్లాడారు. ‘‘ప్రజలపై ఎలాంటి ఒత్తిళ్లు లేకుండా, డ్వాక్రా మహిళలను బలవంతంగా తరలించకుండా, వాలంటీర్ల బెదిరింపులు లేకుండా కేవలం కూటమిలోని భాగస్వామ్య పార్టీలపై ఉన్న అభిమానంతోనే జనం ఈ సభకు హాజరయ్యారు. మనల్ని మనమే కాపాడుకోవాలన్న స్పృహ వారిలో కనిపించింది. ఎన్నికల కమిషన్‌ షెడ్యూల్‌ జారీ చేయడం కూడా సభ సక్సెస్‌కు మరో కారణం. లేకపోతే ప్రజలను వైకాపా నేతలు బెదిరించి ఉండేవారు. వైకాపా ప్రభుత్వం గద్దె దిగిపోవాలన్న సంకల్ప బలంతో ప్రజలు సభకు హాజరయ్యారు’’ అని వెల్లడించారు.