దిల్లీ మేయర్‌ ఎన్నికలు వాయిదా

దిల్లీ: వివాదాస్పదంగా మారిన దిల్లీ నగరపాలక సంస్థ మేయర్‌, డిప్యూటీ మేయర్‌ ఎన్నికలు వాయిదా పడ్డాయి. ముందుగా నిర్ణయించిన ప్రకారం ఈ ఎన్నికలు శుక్రవారం జరగాల్సి ఉంది. ముఖ్యమంత్రి జ్యుడిషియల్‌ కస్టడీలో ఉన్నారని, ఆయన రాజ్యాంగ పరమైన బాధ్యతలను నెరవేర్చలేని అసాధారణ పరిస్థితులు నెలకొన్నాయని లెఫ్టినెంట్‌ గవర్నర్‌ వి.కె.సక్సేనా పేర్కొన్నారు. ఈ మేరకు గురువారం సక్సేనా తరఫున రాజ్‌నివాస్‌ ఓ లేఖ విడుదల చేసింది. అనంతరం నగరపాలక సంస్థ ఎన్నికలను వాయిదా వేసింది. దిల్లీ మద్యం విధానంతో సంబంధమున్న నగదు అక్రమ చలామణి నిరోధక చట్టం (పీఎంఎల్‌ఏ) కేసులో అరెస్టై ప్రస్తుతం తిహాడ్‌ జైల్లో ముఖ్యమంత్రి కేజ్రీవాల్‌ ఉన్నారని, ఆయన అభిప్రాయం లేకుండా ప్రిసైడింగ్‌ అధికారిని నియమించలేమని, అలా నియమించడం సముచితం కూడా కాదని అందులో పేర్కొన్నారు.

భాజపా ఆదేశాల మేరకే: ఆతిశీ

భాజపా ఆదేశాల మేరకే మేయర్‌, డిప్యూటీ మేయర్‌ ఎన్నికలను వాయిదా వేేశారని దిల్లీ మంత్రి ఆతిశీ ఆరోపించారు. దళిత అభ్యర్థి మేయర్‌ కావడం భాజపాకు ఇష్టం లేకనే అలా చేశారన్నారు.