హరియాణా రాజకీయాల్లో కలకలం

నాయబ్‌ సింగ్‌ సైనీ ప్రభుత్వానికి ముగ్గురు స్వతంత్ర ఎమ్మెల్యేల మద్దతు ఉపసంహరణ

చండీగఢ్‌: హరియాణాలో అధికార భాజపా ప్రభుత్వానికి గట్టి ఎదురుదెబ్బ తగిలింది. నాయబ్‌ సింగ్‌ సైనీ నేతృత్వంలోని ప్రభుత్వానికి తాము మద్దతు ఉపసంహరిస్తున్నట్లు ముగ్గురు స్వతంత్ర శాసనసభ్యులు మంగళవారం ప్రకటించారు. ఈ మేరకు మంగళవారం సోంబీర్‌ సాంగ్వాన్‌, రణధీర్‌ గోలెన్‌, ధరంపాల్‌ గోందర్‌లు హరియాణా మాజీ ముఖ్యమంత్రి భూపీందర్‌సింగ్‌ హుడా, పీసీసీ అధ్యక్షుడు ఉదయ్‌ భాన్‌ల సమక్షంలో విలేకరులతో మాట్లాడారు. ప్రస్తుత లోక్‌సభ ఎన్నికల్లో తాము కాంగ్రెస్‌కు మద్దతివ్వాలని నిర్ణయించినట్లు వెల్లడించారు.  ‘‘90 స్థానాలున్న హరియాణా అసెంబ్లీలో ప్రస్తుత సభ్యుల సంఖ్య (మాజీ ముఖ్యమంత్రి మనోహర్‌లాల్‌ ఖట్టర్‌, మరో స్వతంత్ర ఎమ్మెల్యే రంజిత్‌ చౌటాలా రాజీనామాలతో) 88కు పడిపోయింది. భాజపాకు 40 మంది సభ్యుల బలం ఉంది.  నాయబ్‌ సింగ్‌ సైనీ ప్రభుత్వం మైనారిటీలో పడింది. అందుకే తక్షణం ఆయన రాజీనామా చేయాలి’’ అని హరియాణా పీసీసీ అద్యక్షుడు ఉదయ్‌ భాన్‌ పేర్కొన్నారు. తక్షణం అసెంబ్లీ ఎన్నికలు నిర్వహించాలని డిమాండ్‌ చేశారు.