పంటల బీమా పరిహారం దోచుకున్న దొంగలెవరు?

తెదేపా నేత నక్కా ఆనంద్‌బాబు

ఈనాడు డిజిటల్‌, అమరావతి: రైతులకు దక్కాల్సిన పంట నష్టపరిహారాన్ని ముఖ్యమంత్రి జగన్‌రెడ్డి... వైకాపా నాయకులు, కార్యకర్తలకు దోచిపెడుతున్నారని తెదేపా పొలిట్‌బ్యూరో సభ్యులు నక్కా ఆనంద్‌బాబు ధ్వజమెత్తారు. ‘పంట నష్టపోయిన రైతులెవరు? పరిహారాన్ని ఎవరికి కట్టబెట్టారు? బీమా పరిహారం చెల్లింపులో ఎందుకంత రహస్యం? వెబ్‌సైట్‌లో రైతుల పేర్లు ఎందుకు చూపడం లేదు...’ అని మండిపడ్డారు. మంగళవారం విలేకరులతో మాట్లాడారు. ‘బీమా పరిహారం కింద ప్రభుత్వం విడుదల చేసిన రూ.2.977 కోట్లు ఏ రైతులకు ఇచ్చారో ప్రభుత్వం చెప్పాలి. దీనిపై రైతులు అనేక అనుమానాలు వ్యక్తం చేస్తున్నారు. అసలు ఏ ప్రాతిపదికన నష్టపరిహారాన్ని అంచనా వేశారు? ఇందులో కౌలు రైతులు ఎందరు ఉన్నారు? 15 లక్షల మందికి బీమా పరిహారం చెల్లిస్తే వారి పేర్లు బయటపెట్టడానికి ప్రభుత్వానికి వచ్చిన ఇబ్బందేంటి?’ అని నక్కా ఆనంద్‌బాబు తీవ్రంగా ధ్వజమెత్తారు.