నాయకుల మధ్య భావ వైరుధ్యాలు.. పార్టీకి నష్టం కలిగించకూడదు

జనసేన అధ్యక్షుడు పవన్‌కల్యాణ్‌

ఈనాడు, అమరావతి: నాయకులు, శ్రేణుల మధ్య ఉండే భావ వైరుధ్యాలు.. పార్టీ మూల సూత్రాలకు, సిద్ధాంతాలకు భిన్నంగా, పార్టీ ప్రయోజనాలకు విఘాతం కలిగించేవిగా ఉండకూడదని జనసేన అధ్యక్షుడు పవన్‌కల్యాణ్‌ పేర్కొన్నారు. పార్టీ విధివిధానాలు, నియమాలకు విరుద్ధంగా పరిణామాలు చోటుచేసుకుంటే అంతర్గత విచారణ కోసం కమిటీని ఏర్పాటు చేస్తామని చెప్పారు. అందుకు అవసరమైన మార్గదర్శకాలు సిద్ధం చేస్తున్నామని తెలిపారు. హైదరాబాద్‌లోని పార్టీ కేంద్ర కార్యాలయంలో గత ఐదు రోజులుగా జనసేన కార్యకర్తలు, నాయకులతో సమీక్షలు జరిపిన పవన్‌కల్యాణ్‌ పలు నిర్ణయాలు తీసుకున్నారు. ‘‘జనసేన కార్యక్రమాల అమలు, నిర్వహణలో నాయకులు, శ్రేణులు సమన్వయంతో ముందుకు వెళ్లాలి. పార్టీకి బలంగా నిలిచే కార్యకర్తలను విస్మరించొద్దు. పార్టీ నియమావళి, నిబంధనల్ని నాయకుల నుంచి కార్యకర్తల వరకు ప్రతి ఒక్కరూ పాటించాలి’’ అని వివరించారు.