వాలంటీర్లు.. వైకాపా కార్యకర్తల్లాంటివారు

నెల్లూరు ప్లీనరీలో మంత్రి అంబటి

ఈనాడు డిజిటల్‌, నెల్లూరు: ‘గ్రామాల్లో వాలంటీర్ల పెత్తనం ఎక్కువైంది. ప్రజలెవరూ తమ వద్దకు రాలేదని కొందరు చెబుతున్నారు. అసలు ఎవరండీ వాలంటీర్లు. సీఎం జగన్‌మోహన్‌రెడ్డి ఆదేశాల మేరకు ఎమ్మెల్యేలు ఏర్పాటుచేసిన వారు కాదా? ఎవరిని అడిగి పెట్టాం? ఊర్లో సర్పంచి, నాయకులను అడిగి కాదా.. నేను చెబుతున్నా.. వాలంటీర్లందరూ మీరు చెబితేనే వచ్చినవారు.. అవసరమైతే చెప్పండి తీసేస్తాం.. మళ్లీ కొత్తవారిని చేర్చుకుంటాం.. ఎవరైనా తప్పు చేస్తే, పార్టీకి వ్యతిరేకంగా మాట్లాడితే సహించేది లేదు.. వాలంటీర్లు వైకాపాకు పనిచేస్తున్న కార్యకర్తల్లాంటి వారు.. పార్టీ విషయాలను వారి పరిధిలోని 50 ఇళ్లో.. 100 ఇళ్లకో చేరవేసే సైనికులు’ అని రాష్ట్ర జల వనరులశాఖ మంత్రి అంబటి రాంబాబు పేర్కొన్నారు. గురువారం నెల్లూరు గ్రామీణ నియోజకవర్గం పరిధిలోని కనుపర్తిపాడులో ఏర్పాటు చేసిన వైకాపా జిల్లాస్థాయి ప్లీనరీలో ఆయన పాల్గొని మాట్లాడారు. కార్యక్రమానికి పార్టీ జిల్లా అధ్యక్షుడు వేమిరెడ్డి ప్రభాకర్‌రెడ్డి అధ్యక్షత వహించారు. కార్యక్రమంలో వ్యవసాయశాఖ మంత్రి కాకాణి గోవర్ధన్‌రెడ్డి, ఎంపీలు ఆదాల ప్రభాకర్‌రెడ్డి, గురుమూర్తి, ఎమ్మెల్సీలు, ఎమ్మెల్యేలు పాల్గొన్నారు.