వైఎస్సార్‌సీపీ పేరును ఆటాడుకుంటున్న నెటిజన్లు: రఘురామ

ఈనాడు, దిల్లీ: వైఎస్సార్‌సీపీకి పర్యాయపదం పెట్టి నెటిజన్లు సామాజిక మాధ్యమాల్లో విపరీతంగా ట్రోల్‌ చేస్తున్నారని వైకాపా ఎంపీ రఘురామకృష్ణరాజు తెలిపారు. శనివారం ఆయన విలేకర్లతో మాట్లాడారు. యువజన, శ్రామిక, రైతు కాంగ్రెస్‌ అని పేరు పెట్టుకున్నా ఆయా వర్గాలకు ఏమీ చేయకుండా నిండా ముంచేశామన్నారు. మూడు రాజధానులు ఏర్పాటు ఎలాగూ జరగదని, కానీ మూడు ప్రాంతాల్లో తమ పార్టీ నేతలు శృంగార పీఠాలు ఏర్పాటు చేశారని ఎద్దేవా చేశారు. అందులో ఒకరు పల్నాటి పులి, మరొకరు విశాఖ వీరుడు, ఇంకొకరు రాయలసీమ సింహం అన్నారు. ఎంపీ మాధవ్‌పై చర్యలు తీసుకుంటే పెద్ద పదవుల్లోని మరికొందరి పేర్లు వెలుగులోకి వచ్చే ప్రమాదం ఉందన్నారు. ప్రముఖుల వీడియోలు మరో మూడు, నాలుగు వెలుగులోకి వస్తాయని తమ పార్టీ ఎన్నారై విభాగానికి చెందిన వ్యక్తి వెల్లడించారన్నారు. మాధవ్‌పై చర్యలు తీసుకోవాలని రోడ్లపై దిష్టిబొమ్మలు దహనం చేస్తున్నా సీఎం జగన్‌ చర్యలకు వెనుకాడుతున్నారన్నారు.