నేడు రాజస్థాన్‌ సీఎల్పీ సమావేశం

తదుపరి సీఎం ఎంపిక కోసమేనా?

జైపుర్‌: రాజస్థాన్‌ కాంగ్రెస్‌ శాసనసభా పక్ష(సీఎల్‌పీ) సమావేశం ఆదివారం సాయంత్రం 7 గంటలకు ముఖ్యమంత్రి అశోక్‌ గహ్లోత్‌ నివాసంలో జరగనుంది. దీనికి కాంగ్రెస్‌ పరిశీలకులుగా సీనియర్‌ నేత మల్లికార్జున ఖర్గే, పార్టీ రాజస్థాన్‌ వ్యవహారాల ఇన్‌ఛార్జి అజయ్‌ మాకన్‌ హాజరవుతారు. రాష్ట్రంలో వారం రోజుల్లో జరుగుతున్న రెండో సీఎల్పీ సమావేశం(ఈ నెల 20న తొలి సమావేశం జరిగింది) ఇది. కాంగ్రెస్‌ అధ్యక్ష పదవికి పోటీచేస్తానని గహ్లోత్‌ ప్రకటించిన నేపథ్యంలో ఈ భేటీకి ప్రాధాన్యం ఏర్పడింది. ఒకవేళ తాను పార్టీ అధ్యక్షుడైనా.. ముఖ్యమంత్రి పదవిలోనూ కొనసాగుతానని, లేదంటే ఆ పదవిని తనకు నమ్మకస్తుడైన అనుచరుడికి ఇవ్వాలని గహ్లోత్‌ పట్టుబడుతున్నట్లు ప్రచారం జరుగుతోంది. కానీ యువనేత సచిన్‌పైలట్‌ వైపు కాంగ్రెస్‌ అధిష్ఠానం మొగ్గుచూపుతున్నట్లు సమాచారం.