కాంగ్రెస్‌, భాజపాలకు ఓట్లడిగే హక్కు లేదు: జగదీశ్‌రెడ్డి

ఈనాడు, హైదరాబాద్‌: కాంగ్రెస్‌, భాజపాలు మునుగోడు ప్రజలకు ద్రోహం చేశాయని, వాటికి ఓట్లు అడిగే హక్కే లేదని విద్యుత్‌ మంత్రి జగదీశ్‌రెడ్డి తెలిపారు. కాంగ్రెస్‌ అభ్యర్థి రాజగోపాల్‌రెడ్డి ఎమ్మెల్యేగా గెలవడం ద్వారా మునుగోడు ప్రగతి దెబ్బతిందన్నారు. అదే వ్యక్తిని రంగంలోకి దించడం ద్వారా నియోజకవర్గాన్ని మరింత నష్టపరిచేందుకు భాజపా సిద్ధమైందని మంత్రి విమర్శించారు. ప్రజలు తమ పార్టీ అభ్యర్థికే పట్టం కట్టడం ఖాయమన్నారు. మునుగోడు కాంగ్రెస్‌ పార్టీకి చెందిన ఇప్పర్తి పాడి ఉత్పత్తిదారుల సొసైటీ ఛైర్మన్‌ చీమల వరుణ్‌యాదవ్‌, పంచాయతీ మాజీ సభ్యుడు ఈరటి శ్రీశైలం తదితరులు హైదరాబాద్‌లో మంత్రి జగదీశ్‌రెడ్డి నివాసంలో తెరాసలో చేరారు. వారికి గులాబీ కండువాలు కప్పి పార్టీలోకి ఆహ్వానించారు.