YS Sharmila: ‘నలుగురు ఎమ్మెల్యేల కొనుగోలు’ బూటకం: షర్మిల

మానకొండూర్‌, న్యూస్‌టుడే: నలుగురు శాసనసభ్యుల కొనుగోలు వ్యవహారం ఓ బూటకమని వైతెపా అధ్యక్షురాలు వైఎస్‌ షర్మిల విమర్శించారు. ప్రజాప్రస్థానం పేరుతో ఆమె చేపట్టిన పాదయాత్ర బుధవారం కరీంనగర్‌ జిల్లా మానకొండూర్‌కు చేరింది. ఇక్కడ సభలో షర్మిల మాట్లాడుతూ.. ఎమ్మెల్యేలతో నాలుగు స్తంభాలాట అనే సినిమాను ముఖ్యమంత్రి కేసీఆర్‌ విడుదల చేశారని ఎద్దేవా చేశారు. ఎమ్మెల్యే కొనుగోలు వ్యవహారంపై కేసీఆర్‌ మాటలను ఎవరూ నమ్మడం లేదన్నారు. స్థానిక ఎమ్మెల్యే బాలకిషన్‌ కనిపించడం లేదని, దీన్ని పోలీసులు గమనించాలని కోరారు. మొదటిసారి ఎమ్మెల్యేగా గెలిచిన సమయంలో బ్యాంకు బ్యాలెన్స్‌ రూ.లక్ష ఉండగా, ప్రస్తుతం రూ.వందల కోట్లు ఎలా వచ్చాయని షర్మిల ప్రశ్నించారు. ఎంపీ సంజయ్‌ నియోజకవర్గ అభివృద్ధికి ఎలాంటి పనులు చేపట్టలేదని, కనీసం పర్యటించిన దాఖలాలు లేవని విమర్శించారు.